Day Off

Buringot si Lunes samtang nagatulok kay Martes nga masako ang pag-Facebook.

“Kadugay gid sa iya pirmi mag-abot,” kumod ni Miyerkules sa natuyo nga si Huwebes.

“Ara na sya!” syagit ni Sabado sang makita si Biyernes.

“Maayo,” siling ni Dominggo. “Sulod na kita kay masugod na ang misa.”


Editor's Note:
This flash fiction was first published in Mirisi: Hiligaynon Flash Fiction by Kasingkasing Press in 2017.

Sa Ibabaw sang Akon Lamesa

Nakaandan ko na nga daw gin-agyan sang bagyo ang linapta sa ibabaw sang akon lamesa -- bolpen papel libro laragway sensilyo resibo.

"Paano ka sini makapanumdom sang tadlong," sunlog mo sa akon sang nagbisita ka.  Naurungan ako sa kumpas sang imo mga kamot nga daw mga sanga sang puno sang niyog nga tupad sang inyo balay sa Maloco -- nagasaot sa hangin samtang ginahimos mo ang mga ramò, isa-isa, tubtob daw nangin masinaw nga tubi sang baybay ang kristal nga hapin sang akon lamesa. Dayon, gintawag mo ako kag ginpakita ang hunoshunos nga katig-a na itulod-butungon tungod diri nimo ginpangtago ang mga pagkabutang nga nagpagarot sa akon hunahuna sang nagalinapta sila sa ibabaw sang akon lamesa.

"Ari lang diri ang tanan," siling mo. "Ikaw na lang sini bahala maghaboy sang mga indi na nimo kinahanglan."

May pila man ka adlaw sang kahipid ang ibabaw sang akon lamesa. Apang laye sang kalibutan ang pagbalik sa duha ka butang: gamo kag kinaandan.

Ang mga halimbawa sining laye: ikaw, sa imo kahigugma, kag ang ibabaw sang akon lamesa, sa nagagirinual nga papel bolpen libro laragway sensilyo resibo nga indi na mag-igo sa nagaburusasa ko nga hunoshunos.

---
Please ask permission and credit appropriately before reposting.