Bisperas sang Eleksyon

Maawas sa bwas
Ang bulugasan ni Tomas
Malangis ang bibig sa bwas
Sang mga nagabangiris
Nga mga bata ni Tomas
Tungod liempo ang unod
Sang plato sa bwas
Sang pamilya ni Tomas
Matam-is ang yuhom
Sang misis ni Tomas sa bwas
Kay man nagaawas ang bulugasan
Nagalangis ang bibig kag liempo
Ang unod sang ila plato sa bwas.
 
Kag pagkatapos
Maubos ang unod sang bulugasan
Pagkatapos mahugasan ang langis
Sang liempo sa ila mga plato
Pagkaligad sang bwas
Mabalik sa naandan nga lugaw
Patis sabaw sitserya nga tagpiso
Ang pamilya ni Tomas
Kay ginbayluhan sang kawatan
Ang bwasdamlag ni Tomas
Sang isa ka pantasya nga bwas.
 
 
 
7.30 P. M.
12 May 2019
Esplanade, Iloilo City