Sa Math Lang Ako Magaling

Sa Math Lang Ako Magaling

Huwag na nating pag-usapan

Kung paanong naging parang

Linyang may negative slope

Ang damdamin ko para sa ‘yo

Nahulog, patihulog

Falling from left to right.

That’s right.

I fell really, really hard

Really, really fast.

But you left.

And all the while, akala ko

Parehas ang patutunguhan

Ng feelings ko at feelings mo

Pero ayun, feeler lang pala ako.

Huwag na natin itong pag-usapan

Kagaya nang hindi natin pinag-uusapan

Ang walong libong namatay

Na pinatay dahil nadamay sa digmaan

O nanlaban sa pulis, kabilang na

Yung may edad

Disinwebe Katorse Disisais.

Mga bagay na hindi natin

Pinag-uusapan dahil die-hard DDS ka

At sabi mo, die-hard Dilawan ako

Samantalang yung totoo

Eh sa ‘yo lang naman ako

Patay na patay nang todo-todo.

Siguro, in a parallel dimension

Magkakaroon ng pagkakataon

Yung intersection

Ng damdamin nating dalawa.

Siguro eh magkakaroon ako

Sa ‘yo ng halaga,

‘Yung sana naman ay mahigit

Sa isang libong pisong budget ng mga ahensya.

Ewan ko ba,

Ang point ko lang naman dito

Ay ito:

Huwag na nating pag-usapan

Ang lines na hindi coinciding

Sa plane na hindi cartesian

At space na hindi euclidean,

Kagaya nang hindi natin pinag-uusapan

Ang mga linyang iginuhit

Ng mga imbestigador sa kalsadang

Di hamak na mas magaspang

Sa graphing paper

Na nakasanayan na nating guhitan.

Huwag na nating pag-usapan ito

Dahil sa math lang ako magaling

Hindi sa feelings, o pag-amin,

O pagtatanggol sa paniniwalang

Walang buhay ang dapat

Walang habas na kinikitil

So unless pag-uusapan natin

Na ang nararamdaman ko para sa ‘yo

Kailanman ay hindi magiging equal

Sa nararamdaman mo para sa akin

Huwag mo na lang muna

Akong kakausapin

Dahil hindi naman ito tungkol sa math

At sa math lang ako magaling.

(The poem was published by The Kill List Chronicles here)